SEJARAH RUMAH PANJAI NANGA DRAU

         Apin penatai Rajah Brook di Sarawak, Kitai nang udah dulu diau di Melupa laban ka pengudah kitai angkat ari Rimbas. Udah nya lalu angkat ari melupa kitai pindah ke drau. Tuai menua rambau tu menya Jabas, Parai Jabas diganti Chuk anak Gima lalu parai Chuk anak Gima diganti Bundak anak Mawat, Nyalai seganti Minggat anak Changgas to ke tuai nyadi tuai. Nyadi dipaduka bala maioh Antas anak Gima parai iya tu endang asal orang Drau ditu. Antas tu bisi pengerajin maioh penemu ngembuan atur pengawa berindik ari niang aki Boo (Bundak).

       Nyadi nyau tuai mega niang Antas anak Gima iya diganti Minggat anak Changgas. Rumah panjai kitai tu didiri lebuh maia TR. Minggat anak Changgas megai rumah. perintah megai menua Sarawak maia tu menya Rajah Charles Vyner Brooke. Iya tu Rajah ti penudi bendar megai menoa Sarawak. TR. Minggat parai tahun 1941 iya disenggai di rumah kitai ditu. TR. Minggat anak Changgas parai diganti sabang anak empiu serebak enggaunya kamari Jepun datai ngalah menua Sarawak kena tahun 24.12.1941.

       Pengelama TR. Sabang anak empiu nyadi tuai rumah segelama 35 tahun pegai iyanya ari tahun 1941-1976. iyanya pan udah nerima long service medal. Semua pemangsang ke baru diatu beringkah ari iring TR. Sabang anak Empiu enggau Cr. Numpang anak Abang BBS sama enggau sukong mensia dalam rumah tu mega. Kenang tu pulai ka pun baru lebuh sida Chuk, Bundak, Antas baka ka pengawa kitai Iban rambau nya menya ngidup ka diri enggau jalai bumai betaun aja, lepas ari nya mega begiga ka lauk, ikan jelu nang agi maioh. Penggal pengawa umai maioh puang lalu pengawa bukai nadai dikerja nyadi ati sida ti bujang-bujang ti biak-biak orang laki ingin bendar deka pergi begiga ka duit ringgit ngagai menua bukai.

       Sida malu enti enda tepeda ka nanga ai diri empu. Bisi bala sida ti pergi nya pulai ka menua tang bisi parai di menua orang nadai temu rita. Orang indu ke tinggal di menua ditu gawa umai berayan betenun ngidup ka diri. Nyalai jai rumah lama sida ka ba tembawai panjai ka bala nembiak TR. Minggat anak Changgas rambau tu suba bedampa ngachir diau ba kandang menua drau ditu nganti ti berumah baru. Nyadi sida Nambi anak Anyum tu tadi bedampa betampong 12 pintu enda jauh ari atas nanga Drau nya dia. Baka nya mega bala bukai bedampa nadai tentu panjai, semua aum nembiak tuai rumah Minggat di penghulu ka ba dampa sida Nambi tu magang.

        Nyalai arinya sida tu baum berumah betampong baru. Sida berunding ngiga tanah alai berumah baru. Nyadi bisi dika nagaga nandu berumah sida ka dulu ba tembawai panjai dia tang berunding kai nya jauh ari ai mega. Lalu bisi mega sida nyebut dika berumah ba tanah lubok isu, sungai Pelandok enggau ba tembawai Ijok tang semua alai nya bisi penanggol magang. Nyalai sida  berumah dia. Nambi anak Anyum menya bisi bekaul diri sekaban enggau niang sedagar Jeti anak Empiu ti ngasai nganggap ka menua kitai kaki wong tu mudah alai tepat, laut, cina enggau temuai-temuai bukai datai. Nyalai lalu bebai berumah ba tembawai Masing ditu. Lalu ba pendai ka batang Ai Krian. Tang bisi sekeda kitai ditu enggai takut diau semak ai besai laban menua tui agi sunyi dulu kelia.

           Kadang-kadang nya dia bisi jelu ai ayan nambah ka nya mega nganggap ka penyakit ti tu ngerampit dibai orang datai ari ulu ari ili ba menua pala pasang ditu. Nyalai nyau pemutus runding bala maioh dibai sidake tuai setuju nyadi berumah ba tembawai masing ditu. Ditu menya madang ragai engkalat enggau maioh Embawang. Bedurok ngerata tanah enggau cangkul beringkah serta beban ramu. Orang ti terubah bendar beramu TR. Minggat Anak Changgas, Numpang Anak Abang, Umbul Anak Kelawang. Sida tiga tu beban tiang teras ka kawit lalu bakanya mega bala bukai sama beringkah magang. Maya nya menya disebut sida ke tuai serambau enggau semoa tuai-tuai Iban ti dibai perintah Rajah Brooke ngagai Peace Making Ba Simanggang 1st February 1924. Penuai rumah kitai tu di itong beringkah ari maya nya chukup nagai 75 taun baka ti diintu kitai ke taun tu 1999.

             Maya 1999 tu meh rumah tu digaga. Orang ti keterubah nya dulu ngentak TR. Minggat Anak Changgas enggau Numpang anak Abang. Semua pengawa belalu ka runding mensia maioh magang. Atur sida ke tuai maya ngaga rumah tu kelia nadai gawa berumah hari minggu. Jalai ngulih ka belanja semina enggau pengawa kerja getah aja. Rega barang dibeli murah tang duit pedis diulih, dalam taun 1931 kelia rega getah semina 9 cents sekati tang bisi lantang mimit laban padi nadai tentu meli. Jipun datai ngalah menua sarawak kena taun 23.12.1941 nyadi kitai ditu nadai tentu ngadang ka penusah laban perang rembau nya menya raban kitai iban apin bisi utai dikena nemu berita baka ti diatu radio, TV nadai udah meda iya.

             Menua sarawak tu lalu dipegai perintah jipun. Kitai rumah tu bumai penggawa ti berat agi dikemeran ka lalu betupi babi, manok ka ungkup guna diri empu aja. badu ngetau taun 1942,1943 perintah jepun minta padi 8 pasu dalam sepintu ngagai kitai Iban. Rumah kitai tu lalu ka alai gudang padi jipun. Semua Iban dalam batang Krian Kabo Budu nganjong padi kitu magang. Rumah kitai tu penuh laban guni padi jipun. Jipun enggau bala kerani iya diau mendam di tu nerima padi ari orang maioh. Enti kitai bisi nyerah padi maioh ngagai sida dia kitai dika diberi bintang.

             Bulan March/April 1945 jipun alah, perintah British lalu megai kitai Bulan July 1947 Tuan Governor menua sarawak sir Charles Arden Clarke menuai ngagai rumah panjai Nanga Drau ditu. Lebuh penemuai Tuan Governor sir Charles Arden Clarke ngagai rumah kitai kitu maioh bendar mensia datai dipadah sama ngambat tuan Governor. Penghulu-penghulu Tuai-tuai rumah sama enggau nembiak sida tiap-tiap rumah dalam menua saratok bisi datai magang. Rumah kitai tu penuh sekali laban penguang. Tuai rumah kitai maya nya suba TR.Sabang Anak Empiu. Iya siko ari semua tuai-tuai kitai dimenua tu ti Cheregas serta di kelala perintah ditemu orang kulu-kili di menua tu. Rumah kitai penuh sekali laban mensia ke ngambat Tuan Governor. Berengkah ari nya menya bala kitai ditu lalu betambah kering runding nitih ke pemangsang ke baru diatu. Pun taun 1954 gerempong di Budu di buka, kitai ditu sama enggau orang mega orang mega. Rebak nya suba maioh nembiak kitai sama bisi sekula din. Semua pengawa pemangsang kitai ditu sigi nadai di tinggal perintah ari kelia.

            1st January 1990 rumah panjai kitai nanga Drau bulih loan nyerari rumah di kemendar opis perumahan. Ari nya suba rumah kitai bisi nama baru RRPR Nanga Drau Krian Saratok. Rumah tu bisi ansuran nya alai enti sema ka rumah tu bisi kebuah-bisi tegal opis ansuran bejaku ke iya. Diatu kitai bisi berunding deka ngaga rumah baru di kaki wong dia. Tang taja bakanya rumah tu sigi enda ditinggal kitai. Retinya rumah tu nadai dibabak nadai dirusak. Iya sigi endang agi di intu lalu mengkang ditan kitai agi alai diau. nitih ka niat hati akik-inik kitai ti ngaga rumah tu kelia.

             Nampong cherita niang Cr. Numpang Anak Abang ke berandau aku lebuh iya ke agi idup menya sida iya arap ka kitai ke dudi tu ngintu bekau abi kaki-abi jari sida iya enggau pengabis penyemat. Tanah alai rumah kitai tu sigi diperimba Masing enggau rabanya alai sida berumah. Bala kitai ke orang Drau diatu berumah di sungai Pelamdok dia rambau nya kelia. Menua tu kelia semua agi maioh babas tuai enggau kampong apin diperimba. Nya alai enti sema utai ka sekeda utai ti ditulis aku ditu bisi beletisih enggau pengingat  kita ke macha aku, TR.Sabai Anak Kadam minta ampun laban semua nyerungkai utai ke lama-lama. Kena aku ngujong cherita tu arap ka semua mujor ngintu 75 taun umor rumah Nanga Drau tu taun 1999.

 

 

 

Ditulis.

          TR. Sabai Anak Kadam

           Nanga Drau Krian Saratok.